一班人討論嘅時候，我把聲永遠淹沒喺人群之中。

唔知係咪自己把聲容易俾人忽略，每次我講嘢，其他人都聽唔到咁。上莊開會又好、一大班朋友傾閒偈又好，總係冇乜人理我。試過好多次碰板後，漸漸地會怕喺好多人面前講嘢，加上覺得自己好似冇乜內容，就更加冇自信。

不過某次同朋友去唱k嘅時候，佢哋讚我唱歌好聽，先發現原來有人鍾意我把聲，我先開始欣賞吓自己把聲。然後仲膽粗粗咁參加咗校內歌唱比賽，報名嗰下好決斷，突破咗個心理關口，因為好想證明自己嘅實力。

報完之後就即刻淆底，有諗過不如放棄。去到當日一路唱一路都覺得好驚好驚，但同時又會好享受唱歌嘅滿足感。對住台下全部都係人，我好難可以似其他人唱得咁自然，淨係識一碌木咁企定定，隻手震到差啲拎唔塞枝咪。

入咗大學之後，我都繼續有報名參加歌唱比賽。大學嘅人唱歌好勁，我都拎唔到咩獎，但係唔重要，因為我好開心大家認真聽我唱歌，完咗之後會拍手同有反應，至少佢哋聽到我把聲。

曾經淹沒嘅聲音，終於靠唱歌再一次俾大家聽得到。

.

Text: Wai

Design: Charlie and Holly

你都有故事想講？

隨時上 bit.ly/mystoryme 留名  👌🏻