知道自己技不如人加上身形問題，冇得做職業球員之後，我都仲係想做體育相關嘅嘢，就揀咗體育新聞。

初初入去同我本身諗嘅模樣都有落差……咁大家想做記者，第一時間唔會係想做報紙佬(姐係自己去睇波、自己訪問，再自己慢慢砌一篇稿出嚟)，而係想做新聞王子，喺鏡頭面前揸住枝咪嗰種，亦係我中學畢業嗰陣心目中體育記者嘅形象。

不過，後尾做做吓報紙佬發現，文字真係有種魅力喺度。電視新聞每一條得分零鐘，但文字版幅多啲，可以涵蓋多啲、有深度啲。其實我中文一向唔好，只係DSE符碌有個3。但為咗我鐘意嘅運動，真係踏出咗好大步，自己都幾訝異。

更加訝異嘅係，我而家竟然離開咗體育記者呢個範疇，去咗做港聞實習記者。

體育係我嘅comfort zone，體育新聞同樣。因為我熟嗰樣嘢，個腦、知識方面係support到我，做出嚟嘅嘢唔會失禮。所以報港聞實習嗰陣好驚，但我覺得作為一個新聞系學生，係要跑下港聞，最後就硬住頭皮報咗。

實習第一日，我已經倒數緊喇……因為我想快啲完，可以快啲返我原本個世界。即係，好似個地球人上咗火星咁 —— 我第一日已經好想返去地球。

但最後，而家用咗兩個禮拜左右啦，開始stay calm，忍受變接受，接受變……雖然未去到享受，但都好珍惜呢段經歷。因為入到港聞，個世界即刻大咗、做嘅嘢多咗、接觸嘅嘢都多咗，例如做breaking news、做法庭。

我知道，「離別為碰見更大宇宙」。

.

Test：Sisco

Design: Charlie and Holy

你都有故事想講？

隨時上 bit.ly/mystoryme 留名  👌🏻