平時諗好多嘢 ，好易受傷，亦好易傷害到人。例如人哋冇加emoji，我就會覺得人哋情緒化或認真咗；又例如有一次，有人叫我幫個朋友慶祝生日，嗰一下我主觀地覺得佢好命令性質，有hard feeling，就令到我唔想做呢件事，最後嗰年冇同個朋友慶祝到。

諗太多然後越踩越深導致負面情緒，成個月30日我大概有15至20日係咁。如此嚴重，我會直接分散自己注意力，咁我就會做一啲 (如煙酒之外)，我要做嘅野。當刻情緒紓緩咗，我就唔會沉落去，識得拉返自己上嚟。

畫畫其一，後來延伸到去紋身。畫畫係想將靚嘅野畫低，咁與其畫喺紙，keep唔到好耐，不如當身體係塊空白嘅畫布，將靚嘅圖直接印喺個身…… 我將來會係一個紋身師。

影相、跳舞其二。但呢兩樣同畫畫、紋身唔同，身邊朋友都無乜好評，例如話我個角度影得奇怪、話我跳舞手腳唔協調。但我覺得自己個審美觀同其他人有啲唔同，我可以喺佢哋話奇怪嘅角度，睇到自己覺得靚嘅嘢；亦正如我Miss話齋，識跳舞嘅人，永遠唔會笑唔識跳嘅人，因為每一個人都係由唔識跳開始。

佢哋同煙酒相等（雖沒煙酒效率之快），充實我嘅日常、治癒我嘅心靈，係排解我日常負面情緒嘅工具。於是，日常情緒係keep住run緊，我又點會隨便放棄。

人地嘅睇法，我在乎，因為我會有hard feeling；

我唔在乎，因為我唔會放棄自己鐘意嘅野；

唔單止唔放棄，

我在乎，因為我甚至會唔忿氣，要做得更好，證明比佢哋睇，我得。

.

Text: Sisco

Design: Holly

你都有故事想講？

你都有故事想講？

你都有故事想講？隨時上 bit.ly/mystoryme 留名 👌🏻